रामायण घडले ।
महाभारत घडले ।
यांना कारणीभूत ।
होते कुजके शब्द ॥
म्हणून शब्द जपावा ।
शब्द पुजावा ।
शब्द पुसावा ।
बोलण्या आधी ॥
घासावा शब्द ।
तासावा शब्द ।
तोलावा शब्द ।
बोलण्या पूर्वी ॥
शब्द हेचि कातर ।
शब्द सुईदोरा ।
बेतावेत शब्द ।
शास्त्राधारे ॥
बोलावे मोजके ।
नेमके,खमंग,खमके ।
ठेवावे भान ।
देश,काळ,पात्रांचे ॥
बोलावे बरे ।
बोलावे खरे ।
कोणाच्याही मनावर ।
पाडू नये चरे ॥
कोणाचेही वर्म ।
व्यंग आणि बिंग ।
जातपात धर्म ।
काढू नये ॥
थोडक्यात समजणे ।
थोडक्यात समजावणे ।
मुद्देसूद बोलणे ।
ही संवाद कला ॥
शब्दांमध्ये झळकावी ।
ज्ञान,कर्म,भक्ति ।
स्वानुभवातून जन्मावा ।
प्रत्येक शब्द ॥
शब्दां मुळे दंगल ।
शब्दां मुळे मंगल ।
शब्दांचे हे जंगल ।
जागृत राहावे ॥
जीभेवरी ताबा ।
सर्वां सुखदाता ।
तुका म्हणे नाणी ।
पाणी आणि वाणी ।
नासू नका ॥
No comments:
Post a Comment